سياسة الخصوصية

الموقع نفسه

بنستخدم على الموقع أداتين تحليل، مكتوبين تحت بالاسم، عشان نعرف الصفحات بتتستخدم إزاي ونصلّح اللي مش واضح. مفيش إعلانات، ومش بنبيع أي حاجة من البيانات دي ولا بنشاركها مع حد تاني. واختيارك للوضع الداكن أو الفاتح بيتحفظ على متصفحك بس وما بيوصلناش.

Google Analytics

أداة من Google بتعدّ الزيارات وبتقولنا: أنهي صفحات اتفتحت، والزائر جه منين (بحث جوجل، واتساب، رابط مباشر)، ونوع الجهاز والمتصفح، والبلد والمدينة بالتقريب. بتحط كوكيز على متصفحك عشان تعرف إن الزيارة الجاية من نفس المتصفح. مابتعرفش اسمك ولا رقمك، وإحنا مابنبعتلهاش أي حاجة كتبتها.

• سياسة الخصوصية بتاعة Google

Microsoft Clarity

أداة من Microsoft بتسجّل الصفحة بتتستخدم إزاي: الضغطات والسكرول وحركة الماوس، وبتعمل منها خرايط وإعادة عرض للزيارة، عشان نشوف فين الناس بتتلخبط. بتحط كوكيز على متصفحك. واللي بتكتبه في فورم «اطلب نسختك» مخفي عنها ومابيتسجّلش.

• بيان الخصوصية بتاع Microsoft

لو مش عايز ده

تقدر توقّفهم في أي وقت: امسح الكوكيز أو امنعها من إعدادات المتصفح، أو استخدم أي مانع إعلانات وتتبّع. والموقع هيشتغل معاك عادي. ولـGoogle Analytics بالذات فيه إضافة رسمية من Google بتوقّفه على كل المواقع.

• إضافة إيقاف Google Analytics

الفورم وأزرار التواصل

فورم «اطلب نسختك» ما بيبعتش أي حاجة لسيرفر: هو بيجمّع اللي كتبته في رسالة واتساب وبيفتحها عندك عشان تبعتها بنفسك. يعني ما بنستلمش بياناتك غير لما تضغط إرسال في واتساب أو تبعت إيميل.

اللي بنستخدمه من بياناتك

لما تكلمنا، بنستخدم اسمك واسم المحل ورقمك للرد عليك وتجهيز نسختك بس. ما بنبيعش بيانات ولا بنشاركها مع حد تاني.

بيانات المحل داخل البرنامج

في النسخة المحلية بياناتك على جهاز المحل بس، غير تقرير آخر اليوم لو طلبته على الإيميل: بيتبعتلك عن طريقنا. وفي الأونلاين بتبقى على جهازك وعلى السحابة. تقدر تسحب نسخة احتياطية في أي وقت، ولو قررت تسيب النظام بتاخد بياناتك معاك. والبرنامج نفسه مفيهوش Google Analytics ولا Clarity ولا إعلانات.