أسئلة عن برنامج الكاشير قبل ما تقرر

لا. في النسخة المحلية النت مش داخل في البيع أصلًا. وفي الأونلاين كل بيعة بتتكتب على الجهاز الأول، وبتترفع لوحدها لما النت يرجع من غير ما حاجة تتكرر. ولو الجهاز اتقفل في نص الشيفت، تفتحه تلاقي الفواتير زي ما هي.

في النسخة المحلية: على جهاز الكاشير في المحل، ونسخة احتياطية بعد كل شيفت تقدر تاخدها على فلاشة. وفي الأونلاين: على جهازك وعلى السحابة. وفي الحالتين بياناتك ليك، ولو قررت تسيب البرنامج بتاخدها معاك.

لأ. في النسخة المحلية البرنامج كله على جهاز الكاشير. وفي الأونلاين كل جهاز شايل بياناته بنفسه، وبيبعت ويستقبل من السحابة لوحده. مفيش جهاز في المحل لازم يفضل شغّال عشان الباقي يبيع، ومفيش إعدادات شبكة تتظبط.

ويندوز 10 أو 11، 64 بت، على أي كمبيوتر أو جهاز كاشير بشاشة لمس. 4 جيجا رام بتكفّي، و8 أحسن.

أغلب الطابعات الحرارية 80 مم و58 مم شغّالة: على الشبكة، أو بكابل USB وليها تعريف ويندوز. ولو طابعتك بتطلع رموز غريبة، البرنامج بيطبع عليها كصورة. وزرار «فحص الطابعة» في الإعدادات بيطبع ورق تجربة يقولك أنهي طريقة ماشية، ودرج الفلوس بيفتح من الطابعة نفسها.

في الأونلاين بنسطّب البرنامج على أي جهاز تاني بنفس كود الفرع، والأصناف والأسعار والصلاحيات بتنزل عليه من السحابة. الفواتير اللي لسه ماترفعتش بتفضل على الجهاز القديم لحد ما يشتغل تاني، عشان كده الأحسن يبقى في المحل جهاز تاني حتى لو مش بتبيع عليه كل يوم.

أيوه. من «الترحيل من نظام قديم» بتاخد قالب Excel فيه 3 أوراق: الموردين والأصناف والمنتجات. بتملاه وترفعه، والبرنامج بيقولك إيه اللي دخل وإيه اللي فيه غلط، تصلّحه وترفعه تاني من غير ما حاجة تتكرر.

كل منتج بيقول بياخد إيه من المخزن: لاتيه واحدة بتخصم البن بالجرام واللبن بالملي والكوب بالعدد، من الدفعة اللي اتصرفت فعلًا — أول ما يدخل أول ما يخرج — فتكلفة الكوب بتطلع بسعر الشراء الحقيقي. وتقدر تبيع من أول يوم من غير ما تربطه بحاجة.

أيوه. بتوصّل ميزان إلكتروني بالجهاز، والكاشير بيبيع البن بالكيلو أو بالجرام من قراية الميزان، والمخزون بيتخصم بنفس الوزن.

في الأونلاين: كل فرع بمخزنه وفواتيره وشيفتاته، والتحويل بين الفروع بيتسجّل بمين سلّم ومين استلم. وانت شايف الفروع كلها من مكان واحد ومن موبايلك، وكل فرع بيكمّل يبيع لوحده لو النت وقع عنده.

لأ. الخصم فوق الحد اللي تحدده، والمرتجع، وإلغاء حاجة اتبعتت للبار، محتاجين موافقة مدير برقمه السري، والكاشير مايقدرش يوافق لنفسه. وكل ده بيتسجّل في سجل الأنشطة باسم اللي عمل واللي وافق.

مش محتاج تدريب طويل، ولو عايز بنعلّم الموظفين: اللي هيمسك الكاشير واللي هيمسك المخزون والتقارير. والكاشير بيدخل برقمه السري ويبيع على طول.

البرنامج مش على الموقع. كلمنا على واتساب، وإحنا بنبعتهولك جاهز أو بنيجي نسطّبه عندك ونظبطه على أصنافك.

ابعتلنا على واتساب على نفس الرقم، وبنرد في نفس اليوم. وفي الأونلاين نقدر نشوف حالة المحل ونساعدك من غير ما نيجي.